Shoqata Shqiptare e Shkencave Politike (ALPSA) 
do të organizojë në Tiranë, më 19-20 nëntor 2004, 
Konferencën e parë Shqiptare të Shkencave Politike.

 Shkenca Politike dhe Shoqëria - Sfidat e Demokratizimit, Zhvillimit dhe Integrimit Europian 

[English language information]     [Conference Registration and Application]

Konferenca do të mbledhë sëbashku shkencëtarë politikë e socialë nga Shqipëria e vendet fqinjë, Europa Perëndimore dhe Shtetet e Bashkuara,  për të shkëmbyer ide dhe bashkëvepruar, me synimin e përbashkët të zhvillimit të studimeve kërkimore politike shqiptare. Konferenca do të kete 2 pjesë kryesore (1) prezantimin e studimeve kërkimore që lidhen me temën kryesore të konferencës dhe (2) një workshop si të përmirësojmë mësimdhënien akademike të shkencave politike në universitetet shqiptare. Konferenca eshte e hapur edhe për të gjithë studentët pasuniversitar shqiptarë, të cilët studiojnë shkenca politike brenda ose jashtë Shqipërisë. 

Një numër prezantimesh të përzgjedhura do të botohen në liber dhe ne format elektronik, dhe do t’u vihen në dispozicion institucioneve akademike dhe kërkimore në Shqipëri dhe jashte saj.

Shpenzimet e udhëtimit dhe pjesemarrjes për të gjithë pjesëmarrësit që do të prezantojnë punimet e tyre në konferencë do te mbulohen nga ALPSA. 
Per te marr pjese ne konference duhet te plotesoni formularin e rregjistrimit me posht. Per prezantimet duhet te dergohet edhe nje abstrakt deri ne 250 fjale ne nje nga fushat e meposhtme. 

1.     Marrëdhëniet mes Bashkimit Europian dhe Shqiperise.

Bashkimi Europian është shfaqur si një ndër aktorët kryesor të angazhuar në transformimet pas-komuniste ne Europen Lindore. Krahas marrëveshjeve të mëparshme të bashkëpunimit, BE ka krijuar një portofol të zgjeruar mekanizmash mbështetës për demokracitë e reja në Europën Lindore. Politika e BE-së në Ballkan lidhet ngushtë me instrumentet e kushtëzimit. Shqipëria, përveçse merr pjesë në Paktin e Stabilitetit, ka vendosur edhe marrëdhënie kontraktuale me BE-në në kuadër të Proçesit të Stabilizim-Asocimit. Prezantimet ne kete teme mund te adresojne pyetje si: A shfaq dobësi përqasja e BE-së ne Shqiperi dhe Ballkanin Perendimor? A bien ndesh përpjekjet rajonale për bashkëpunim me proçeset më të gjera integruese të BE-së? A e zbeh premtimi i mjegullt për anëtarësim besueshmërinë e kushtëzimit politik? A ka përputhje mes përpjekjeve të BE-së dhe programeve të aktorëve të tjerë? Si është fuqia e BE-së krahasuar me atë të aktorëve të tjerë nderkombetar? A kanë patur sukses përpjekjet integruese të BE-së? Në cilat fusha apo sektorë ndikimi ka qenë më domethënës dhe në cilat jo?

2.     Institucionet demokratike në Shqipëri (dhe Europën Lindore).

Institucionet demokratike përcaktojnë mënyrat e ndërmjetësimit të interesit politik, bërjen e politikave publike dhe qëndrueshmërinë e regjimit në një vend. Ne do të donim të diskutonim pasojat politike të institucioneve që ndikojnë strukturat qeverisëse të demokracisë në Shqipëri dhe demokracive të tjera të reja. Cilat janë rezultatet dhe ndërveprimet e përgjithshme mes institucioneve në regjimet demokratike? Panele të veçanta do të përqendrohen tek sistemet elektorale, marrëdhëniet legjislativ-ekzekutiv, sistemet e partive politike, shoqëria civile, roli i medias në politikë, etj.

3.     Zhvillimi ekonomik dhe politika.

Në sferën e kësaj teme përfshihen disa çështje. Ne presim të organizojmë panele të ndryshme me fokus rolin e institucioneve vendase, tregtisë ndërkombëtare dhe globalizimit në zhvillimin ekonomik të një vendi. Një listë e kufizuar problematikash të sugjeruara përfshin diskutimin e çështjeve që lidhen me të drejtën e pronës, korrupsionin, marrëdhëniet tregtare apo regjimet e kursit të këmbimit, duke u ndalur veçanërisht tek Shqipëria dhe vendet e Ballkanit Perëndimor. Punimet mund të trajtojnë edhe çështje më të përgjithshme si: A e ka dëmtuar globalizimi autonominë e ekonomisë kombëtare? Ndikimi i institucioneve vendase në mënyrën se si globalizimi ndikon në ekonominë kombetare? Si i ndikon globalizimi preferencat politike të aktorëve vendas? Cilat janë pasojat politike e ekonomike të Euroizimit te Ballkanit Perëndimor?

4.     Mesimdhenia e Shkencave Politike.

Për të diskutuar mbi këtë çështje do të organizohet një workshop dhe një panel. Workshop-i do të jetë i hapur për të gjithë pjesëmarrësit. Workshop-i do të përqëndrohet në tema si: pedagogjia, përdorimi i teknologjisë (si, prezantimet me power point, filmat dokumentarë, interneti), diskutimi i perspektivave globale të politikës në auditore, avancimi i arsimimit dhe angazhimit qytetar, etj. Të gjithë pjesëmarrësit në konferencë do të gëzojnë mundësi të barabartë për të dhënë kontributin e tyre dhe për të marrë pjesë në workshop-in e panelin në fjalë.

Kliko ketu te plotesosh rregjistrimin per ne konference.

 Copyright © 2004 the Albanian Political Science Association